Programi i PS, Berisha i përgjigjet Ramës: Po na kopjoni! Do punojmë që të rikthejmë të rinjtë në Shqipëri

Një ditë pasi kryesocialisti Edi Rama prezantoi programin e për një tjetër mandat në krye të qeverisë, kreu i Partisë Demokratike thotë se mazhoranca po kopjon programin e opozitës, pasi nuk ka alternativë për qytetarët shqiptarë.

“Ne do mundësojmë kredi të buta për çdo çift të ri, për banesë. E di se çmimet sot janë shumë të larta dhe duket se banesa është mollë e ndaluar, megjithatë ne do të ofrojmë mundësi reale për ju, me mbështetje financiare dhe kredi të buta. Ne do të bëjmë gjithçka që politika e fëmijës së tretë, të jetë mbështetje që për fëmijën e tretë shteti të japë mbështetjen e tij deri në moshën 23 vjeçe. Çdo i ri, apo çdo emigrant do të trajtohet pa dallime nëse do të vijë për të investuar në Shqipëri, nuk do të taksohet për 5 vite. Ne do të punojmë që t’i rikthejmë në Shqipëri.

Kundërshtarët tanë kanë kopjuar programin tonë, por ata janë gënjeshtarë dhe të korruptuar dhe në këtë mënyrë e trajtojnë programin. Kanë 12 vite në pushtet dhe nuk kanë ofruar asgjë tjetër veç se kanë dëbuar të rinjtë nga vendi. Edi Rama është një arrogant i lindur dhe e ka në gjak, është problematik, vërtetë problematik. Ai e di se të rinjtë e urrejnë arrogancën dhe nuk e pranojnë, e kështu ata nuk e pranojnë. Do që ai të largohen nga vendi”, tha Berisha.

Kreu i opozitës thotë se vendimi i parë i qeverisë së tij, nëse votëbesohet nga shqiptarët, është rihapja e rrjetit social TikTok, i cili, sipas tij, censuron demokracinë.

“Vendimi ynë i parë do të jetë rihapja e rrjetit social TikTok, sepse duke goditur këtë platformë për qëllime censure, të gjithë duhet ta dinë se diktatura nis me censurën”, shtoi kryedemokrati.

Këto deklarata kreu i opozitës i bëri gjatë një tryeze të rrumbullakët me temë “Riktheni të rinjtë shqiptarë përsëri në atdhe”, ku u prezantua edhe programi i PD, ku fokus do të jetë mbështetja e të rinjve dhe rikthimi në Shqipëri i atyre që janë larguar nga vendi.