Prag gjysmëfinalja me Dinamon / Vllaznia do të jetë e detyruar të vuajë mungesën e Balës edhe ndaj bluve
Vllaznia nuk ka patur kohë të “qajë” pikët e lëna me Teutën në barazimin e bardhë pa gola në “Loro Boriçi” pasi ndeshja e radhës është më 2 prill, e vlefshme për Kupën e Shqipërisë.
Një ditë para saj, tekniku i kuqebluve e nisi konferencën për mediat me ngarkesën që i duhet të përballojë ekipi me ndeshjet në periudhë të afërt kohore.
“Kjo frekuencë e ndeshjeve në çdo tre ditë më rikthen pas në kohë, sepse më kujton periudhën kur luaja si lojtar në Champions League.
Mezi po i pres sfidat e radhës, sepse është vërtetë i bukur ky moment, kur jemi në garë për të dy trofetë e sezonit.
Duhet të ruajmë energjinë pozitive si ekip dhe të mbështesim lojtarët në fushën e blertë”, u shpreh Brdaric
Tekniku Brdaric vlerëson kundërshtarin e radhës, Dinamon për të gjithë atë çfarë ka treguar deri më tani.
“Dinamo ka zhvilluar një sezon shumë të mirë deri tani. Ata kanë një trajner shumë të mirë dhe lojtarë me përvojë. Ne gjithashtu jemi një skuadër e fortë dhe nesër dua të shoh entuziazëm tek lojtarët në fushën e lojës”, vijoi Brdaric
Vllaznia do të vuajë sërish mungesën e Balës në fushën e lojës.
“Edhe para ndeshjes me Teutën patëm mungesa dhe ndërrimet e hershme gjatë saj na humbën ekuilibrin në lojë. Jam i ndërgjegjshëm që edhe në këtë ndeshje pa sulmuesin kryesor Balaj nuk do të jetë e lehtë, por duhet të japim më të mirën në fushën e blertë”, theksoi Brdaric .
Krahas Vllaznia-Dinamo, që do të luhet më 2 prill në orën 19 në “Loro Boriçi”, gjysmëfinalja tjetër do të jetë Egnatia-Partizani.
Sfidat e kthimit do të luhen pas tre javësh.
