Papa Leoni XIV kremton meshën e parë: Besimi shpesh përçmohet, por misioni është urgjent
Papa i sapozgjedhur Leoni XIV kremtoi meshën e tij të parë si kreu i Kishës Katolike, një ditë pas zgjedhjes nga konklava e kardinalëve në Kapelën Sistine. Gjatë homelisë, ai bëri thirrje për një përkushtim të thellë nga të gjithë ata që ushtrojnë shërbesa me autoritet brenda Kishës.
“Edhe sot ka shumë kontekste në të cilat besimi i krishterë konsiderohet diçka absurde, për njerëzit e dobët dhe jo inteligjent; kontekste në të cilat siguritë e tjera preferohen ndaj tij, siç janë teknologjia, paratë, suksesi, pushteti, kënaqësia. Këto janë mjedise në të cilat nuk është e lehtë të dëshmosh dhe të shpallësh Ungjillin dhe ku ata që besojnë tallen, kundërshtohen, përçmohen ose në rastin më të mirë tolerohen dhe mëshirohen”, tha Papa.
Ai theksoi vështirësinë për të dëshmuar Ungjillin në një botë që kundërshton apo përçmon besimtarët.
“Këto janë mjedise në të cilat nuk është e lehtë të dëshmosh dhe të shpallësh Ungjillin dhe ku ata që besojnë tallen, kundërshtohen, përçmohen ose në rastin më të mirë tolerohen dhe mëshirohen. E megjithatë, pikërisht për këtë arsye misioni është urgjentisht i nevojshëm, sepse mungesa e besimit shpesh sjell me vete tragjedi të tilla si humbja e kuptimit të jetës, harresa e mëshirës, shkelja e dinjitetit të personit në format e tij më dramatike, kriza e familjes dhe shumë plagë të tjera nga të cilat vuan dhe jo pak shoqëria jonë”, tha Papa.
Kardinali Robert Francis Prevost nga Shtetet e Bashkuara u zgjodh Papa i 267-të, duke hyrë në histori si Papa i parë amerikan. Ai do të njihet me emrin papnor Leoni XIV.
