Zgjedhjet 2025 në media – Integriteti mediatik gjatë fushatës zgjedhore, në fokusin e OSBE-së
“Integriteti mediatik gjatë periudhës zgjedhore” ishte tema e një sesioni informues të zhvilluar sot në Shkodër, i organizuar nga Prezenca e OSBE-së në Shqipëri me pjesëmarrjen e përfaqësuesve të mediave vendore.
Në qendër të diskutimeve ishte roli i rrjeteve sociale në pasqyrimin e fushatës zgjedhore dhe nevoja për rregullimin e tyre përmes legjislacionit përkatës.
Sipas të dhënave të prezantuara gjatë sesionit, ndërsa televizioni monitorohet rregullisht për balancën në mbulimin e subjekteve politike, rrjetet sociale aktualisht mbeten jashtë këtij monitorimi për shkak të një vakumi ligjor.
Gjithashtu, në këtë sesion u diskutua roli i institucioneve si Komisioni Qendror i Zgjedhjeve dhe Autoriteti i Mediave Audiovizive në raport me median gjatë zgjedhjeve, etika profesionale e raportimit, si dhe u analizuan raste konkrete nga raportimet gjatë proceseve zgjedhore të mëparshme.
