Safet Bajri shoqërohet në Tiranë për të dhënë deklarime, 3 ditë më parë iu kontrollua banesa nga RENEA

Safet Bajri është shoqëruar sot nga policia për t’u marrë në pyetje në Tiranë. Sipas avokatëve të tij, Bajri ishte thirrur për t’u pyetur në Policinë e Shkodrës në orën 11.00, por kur ka shkuar atje është njoftuar se pyetjet ndaj tij do të realizohen në Tiranë dhe jo në Shkodër, siç ishte planifikuar fillimisht.

Mbrojtja e tij ka theksuar se nuk ka pasur asnjë njoftim për një urdhër arresti, por i është kërkuar marrja për herë të dytë e ADN-së së Safet Bajrit.

Bajri është shoqëruar me masa sigurie për të udhëtuar drejt Tiranës, ku do të vazhdojë procedura e marrjes në pyetje. Tre ditë më parë, me urdhër të SPAK në banesën e Safet Bajrit u zhvilluan kontrolle nga forcat RENEA.

Këto kontrolle u zhvilluan edhe lidhur me vrasjet dhe atentatet e ndodhura së fundmi në qytetin e Shkodrës.