“Java ndërkombëtare” në UNISHK – Synohet forcimi i bashkëpunimit akademik me universitetet partnere të BE-së
Me synim forcimin e bashkëpunimit dhe ndarjen e praktikave më të mira në fushën e ndërkombëtarizimit, Universiteti “Luigj Gurakuqi ka organizuar “Javën ndërkombëtare” duke sjellë në Shkodër përfaqësuesit e universiteteve partnere nga disa shtete të Evropës.
Në hapje të veprimtarisë, rektori Gjuraj theksoi rëndësinë e bashkëpunimit ndërkombëtar në arsim si një mënyrë për të përballuar sfidat e një sistemi arsimor në ndryshim të vazhdueshëm.
Axhenda e kësaj jave përfshin sesione mbi ndikimin e ndërkombëtarizimit në arsimin e lartë, diskutime mbi sfidat e projekteve ndërkombëtare, si dhe tematika që lidhen me mobilitetin e studentëve dhe stafit.
Universiteti i Shkodrës “Luigj Gurakuqi” e ka vendosur ndërkombëtarizimin në qender të strategjisë së tij zhvillimore.
Partneritetet e universitetit përfshijnë institucione prestigjioze të arsimit të lartë në vende si Italia, Gjermania, Franca, Spanja, Holanda, Republika Çeke dhe Letonia.
