Bazë armësh në Shkodër / Arrestohet 61-vjeçari, i gjenden 11 pistoleta, 2000 copë fishekë, 2 antiplumb dhe silenciator
Është zbuluar në fshatin Rrencë në Shkodër, një banesë e cila ishte kthyer në një “bazë” ku për llogari të grupeve kriminale mbaheshin arsenal armësh.
Gjatë operacionit të finalizuar “Baruti”, policia gjeti 11 pistoleta, kapsollë detonatore me fitil zjarrpërcjellës, rreth 2000 fishekë të kalibrave të ndryshëm, 2 antiplumba dhe 1 silenciator.
Në pranga është vënë pronari i banesës 61-vjeçari, Çezarin Jaku.
Ndërkohë, armët do t’i nënshtrohen ekspertizës në Institutin e Policisë Shkencore, për të provuar përdorimin e tyre ose jo për ngjarje kriminale.
Gjithashtu, nën drejtimin e Prokurorisë së Shkodrës, po hetohet për të identifikuar dhe nxjerrë përpara përgjegjësisë penale, të gjithë shtetasit e implikuar në këtë rast.
Materialet procedurale iu referuan Prokurorisë së Shkodrës, për veprime të mëtejshme.
