Trupi i Papa Françeskut zhvendoset në Bazilikën e Shën Pjetrit për homazhet

Trupi i Papa Françeskut do të zhvendoset këtë të mërkurë në Bazilikën e Shën Pjetrit, ku do të qëndrojë për homazhet publike deri ditën e shtunë, kur do të mbahet ceremonia e varrimit. Mijëra besimtarë nga e gjithë bota janë mbledhur në Vatikan për të nderuar Papën, i cili ndërroi jetë në moshën 88-vjeçare.

Ceremonia e zhvendosjes do të nisë me një lutje të drejtuar nga Kardinali Kevin Farrell, përpara se arkivoli të vendoset në Bazilikë për të lejuar qytetarët të bëjnë homazhet e tyre. Rreshtat e pelegrinëve kanë filluar që në orët e para të mëngjesit, ndërsa autoritetet raportojnë për dhjetëra mijëra njerëz që kanë zbritur në Vatikan në dy ditët e fundit.

Papa Françesku do të varroset në Bazilikën e Shën Marisë së Madhe, duke u bërë Papa i parë që prej Leo XIII në vitin 1903 që do të prehet jashtë Vatikanit. Vetë Papa kishte kërkuar një varrim të thjeshtë, larg praktikave ceremoniale tradicionale të Selisë së Shenjtë.

Në ceremoninë e varrimit, që do të mbahet të shtunën, pritet të marrin pjesë liderë të shumtë botërorë, përfshirë presidentin amerikan Donald Trump, kryeministrin britanik Keir Starmer, presidentin francez Emmanuel Macron dhe presidentin ukrainas Volodymyr Zelensky. Nga Mbretëria e Bashkuar, pritet të jetë i pranishëm Princi William, në përfaqësim të mbretit Charles.