Tragjedi në Mesdhe, mbytet anija me emigrantë, 116 viktima
Një tjetër tragjedi ka goditur Mesdheun qendror. Sipas organizatës humanitare Sea-Watch, 116 persona kanë humbur jetën pasi një anije që transportonte emigrantë u mbyt pak orë pas nisjes nga Zuwara, në Libi. Në bord ishin 117 migrantë, por vetëm një prej tyre arriti të mbijetojë, i shpëtuar nga një peshkatar tunizian. Ngjarja dyshohet të ketë ndodhur që më 19 dhjetor.
Alarm Phone, rrjeti i emergjencës që monitoron lëvizjet e anijeve të migrantëve, raportoi se më 19 dhjetor kishte marrë informacion për nisjen e mjetit lundrues dhe kishte tentuar disa herë të kontaktonte përmes telefonit satelitor, por pa sukses.
Dy ditë më vonë, mbrëmjen e 21 dhjetorit, Alarm Phone mori informacion se disa peshkatarë tunizianë kishin gjetur një të mbijetuar të vetëm në një varkë druri. Burri kishte deklaruar se ishte nisur nga Zuwara dy ditë më parë dhe se ishte i vetmi që kishte mbijetuar.
Organizata thotë se ka njoftuar autoritetet italiane dhe libiane, por nuk ka marrë përgjigje të qarta.
Sipas dëshmisë së të mbijetuarit, kushtet atmosferike u përkeqësuan menjëherë pas nisjes, me erëra që arritën deri në 40 km/h, duke e bërë udhëtimin fatal.
Alarm Phone akuzoi autoritetet italiane për mungesë transparence, pasi Guardia Costiera ndërpreu komunikimin pa dhënë informacion. Nga ana tjetër, pala libiane mohoi të ketë kryer ndonjë operacion shpëtimi në datat 18 dhe 19 dhjetor.
Sipas Organizatës Ndërkombëtare për Migracionin (OIM), bilanci i viktimave në Mesdheun qendror që nga fillimi i vitit ka arritur në 568 persona, duke e konfirmuar këtë zonë si një nga më të rrezikshmet për emigrantët që tentojnë të kalojnë drejt Europës.
