Sophia Loren i jep lamtumirën Valentinos: Do të të mbaj gjithmonë me vete, kishe shpirt fisnik
Ikona e kinemasë botërore, Sophia Loren, ka shprehur dhimbjen e thellë për ndarjen nga jeta të mikut të saj të vjetër të modës, Valentino Garavani.
Në një mesazh plot emocione, aktorja legjendare ka kujtuar jo vetëm artistin, por mbi të gjitha njeriun pas krijimeve madhështore.
“I dashur Valentino, lajmi për ndarjen tënde nga jeta më trishton thellë. Me ty ndava momente dashurie të madhe dhe respekti të sinqertë reciprok. Ti kishe një shpirt të sjellshëm, të pasur me humanizëm. Ishte një privilegj të të njihja dhe unë gjithmonë do të të mbaj me vete,” shkruan Loren.
Ajo shtoi se zemra e saj dhe e familjes së saj janë pranë partnerit të tij historik, Giancarlo Giammetti, dhe të gjithë të afërmve.
60 Vite dashuri me kinemanë, nga Liz Taylor te Julia Roberts
Lidhja e Valentino Garavanit me ekranin e madh nuk ishte thjesht profesionale; ishte një histori dashurie që zgjati për më shumë se gjashtë dekada. Ai ishte stilisti i preferuar i divave absolute, duke i veshur ato në momentet më triumfuese të karrierës së tyre.
Lista e yjeve është e pafundme: Monica Bellucci, Jane Fonda, Sharon Stone, Halle Berry, Gwyneth Paltrow, Jennifer Lopez, e deri te brezi i ri si Zendaya dhe Florence Pugh.
Fillimet me Elizabeth Taylor
Gjithçka nisi në fillim të viteve ’60. Ylli i parë i madh i Hollywood-it që u dashurua me stilin e tij ishte Elizabeth Taylor. Ajo veshi një fustan të bardhë me pupla në premierën e “Spartacus” në Romë.
Anekdota e miqësisë së tyre është legjendare: Valentino i kërkoi asaj një foto së bashku, dhe ajo pranoi me kushtin që ai t’i dhuronte një fustan. Që atëherë, ai krijoi gardërobën e saj për filma dhe e veshi atë në dasmën e vitit 1991, si dhe në shumë ceremoni të Oscars.
Mbreti i Tapetit të Kuq (Oscars) Valentino u bë sinonim i fitores në natën e çmimeve Oscar.
Jane Fonda (1981): E zgjodhi atë kur tërhoqi çmimin në emër të babait të saj.
Jessica Lange (1983): Shkëlqeu me një fustan jeshil mente kur fitoi për filmin Tootsie.
Sophia Loren (1991): Veshi krijimin e tij kur mori Oscarin e Nderit për Karrierën.
Julia Roberts (2001): Një nga momentet më ikonike të modës. Kur fitoi Oscarin për Erin Brockovich, ajo veshi një fustan “vintage” Valentino të vitit 1992, duke vendosur një standard të ri elegance.
Në vitet e fundit, muza e tij ishte Anne Hathaway, e cila jo vetëm shkëlqeu me të kuqen Valentino në Oscars 2011, por i besoi atij edhe fustanin e saj të nusërisë.
Valentino, me sensin e tij të humorit dhe karizmin e pashoq, u shfaq edhe si vetvetja në filma kult si The Devil Wears Prada (ku veshi Meryl Streep) dhe Zoolander 2, duke çimentuar statusin e tij jo vetëm si stilist, por si një ikonë e kulturës pop.
