“Shqipëria inteligjente” – Emisioni i ri në RTSH për më të suksesshmit në vend

“Shqipëria Inteligjente” është emisioni më i ri i cili i shtohet buqetës së programeve të Radio Televizionit Shqiptar.

Ky emision i cili vjen nën autorësinë dhe moderimin e Greta Allushit do të nisë rrugëtimin e tij sonte në mbrëmje.

Fokusi i emisionit do të jenë investitorë nga fusha të ndryshme si arti, programimi, sporti, agroturizmi, bujqësia, kultura, inovacioni e të tjerë, të cilët do të tregojnë histori e ndajnë emocione.

Personazhe të cilët kanë një rrugëtim suksesi për të rrëfyer nga fusha të ndryshme, por edhe personazhe të cilët rikthehen në vendin e tyre për të investuar në ëndrra të bëra realitet.

“Sot është puntata e parë dhe për hir të vërtetës kemi marrë një synim të qartë dhe të bukur, t’i tregojmë Shqipërisë që ka shqiptarë shumë inteligjent, të cilën vendosen të investojnë në vendin e tyre. Mund të kenë studiuar jashtë, por e shohin të ardhmen këtu, në vendin e tyre. Vijnë edhe si rrëfime suksesi ku fillimisht i trajtojmë më terren e pastaj i komentojmë në studio me të ftuar special që mund të jenë nga fusha të ndryshme. Trajtohen të gjitha problematikat si edhe zgjidhjet që mund të japim në raste të tilla”, u shpreh moderatorja Greta Allushi.

Emisioni “Shqipëria Inteligjente” do të transmetohet çdo të martë ora 19:00 në ekranin e RTSH 1.