Shqipëria hedh një hap tjetër drejt integrimit në BE, propozohen ndryshime të rëndësishme në “Ligjin për Shërbimet”

Ministria e Ekonomisë, Kulturës dhe Inovacionit ka propozuar një projektligj kyç për ndryshimin dhe shtimin e ligjit ekzistues “Për shërbimet në Republikën e Shqipërisë”. Ky , që pritet të miratohet brenda vitit 2025, synon të përafrojë plotësisht legjislacionin shqiptar me Direktivën 2006/123/KE të Bashkimit Evropian, e njohur si “Direktiva e Shërbimeve”. Qëllimi kryesor është krijimi i kushteve për ushtrimin e lirë të shërbimeve ndërkufitare dhe thjeshtimin e ofrimit të shërbimeve nga operatorët e BE-së në Shqipëri.

Qëllimet dhe objektivat kryesore

Projektligji i ri sjell një sërë ndryshimesh thelbësore, të cilat do të ndikojnë në mënyrë horizontale në të gjithë sektorët e shërbimeve. Ndër objektivat kryesore janë:

Përmirësimi i dispozitave ekzistuese. Ligji do të përfshijë koncepte thelbësore të Direktivës së Shërbimeve, duke qartësuar dhe saktësuar dispozitat ekzistuese në lidhje me të drejtën e vendosjes dhe mbrojtjen e përfituesve të shërbimeve.

Krijimi i premisave për shërbime ndërkufitare me BE-në. Do të vendoset një kuadër rregullator për ofrimin e shërbimeve ndërkufitare ndërmjet Shqipërisë dhe vendeve anëtare të BE-së, duke thjeshtuar dhe nxitur aktivitetin e operatorëve evropianë në vend.

Përfshirja e bashkëpunimit administrativ dhe ndërveprimi me sistemin IMI. Projektligji do të përmirësojë shkëmbimin e informacionit ndërmjet autoriteteve rregullatore, me synim uljen e barrës burokratike dhe lehtësimin e mbikëqyrjes së shërbimeve ndërkufitare, duke u përafruar me praktikat administrative të BE-së.

Vendosja e kërkesave të unifikuara për shërbimet. Ndërhyrjet në legjislacionin sektorial do të jenë të unifikuara dhe të koordinuara, duke siguruar një standard të qëndrueshëm në ofrimin e shërbimeve.

Përmbushja e angazhimeve të PKIE 2024-2026. Ky ndryshim ligjor është një masë strategjike e parashikuar në Planin Kombëtar për Integrimin Evropian, duke siguruar harmonizimin e plotë me Direktivën e Shërbimeve brenda afatit të caktuar (2025).

Risitë kryesore të projektligjit

Projektligji, i përbërë nga 14 nene, sjell risi të rëndësishme si përkufizime të reja dhe qartësimi i fushës së zbatimit:

Nenet 1, 2 dhe 3 ridefinojnë qëllimin e ligjit, përfshijnë zbatueshmërinë edhe për aktivitetet ndërkufitare dhe qartësojnë marrëdhëniet me ligjet e posaçme.

Neni 4 shton përkufizime të reja për një kuptueshmëri më të mirë të ligjit dhe rolit të Shqipërisë si vend i ardhshëm anëtar i BE-së.

Liria e Ofrimit të Shërbimeve Ndërkufitare

Neni 10 prezanton një kapitull të ri, duke lejuar bizneset dhe profesionistët të ofrojnë shërbimet e tyre në shtetet anëtare të BE-së pa u përballur me kufizime të pajustifikuara.

Të drejtat e përfituesve dhe cilësia e shërbimeve

Neni 12 rikoncepton kapitullin IV, duke e riemërtuar si “Të drejtat e përfituesve dhe cilësia e shërbimeve”. Ky kapitull ndahet në dy seksione:

Të drejtat e përfituesve- Përfshin garancitë profesionale, ku ofruesit e shërbimeve duhet të kenë sigurime ose garanci të përshtatshme për të mbuluar çdo detyrim. Garancitë e lëshuara nga vendet e BE-së do të njihen si të barasvlershme.

Informacioni për ofruesit dhe cilësia e shërbimeve- Prezantohen koncepte si aktivitetet multidisiplinare (ofruesit nuk duhet t’u nënshtrohen kërkesave që i detyrojnë ata të ushtrojnë ekskluzivisht një veprimtari të caktuar), politikat e cilësisë së shërbimeve (nëpërmjet të cilave Këshilli i Ministrave do të nxisë përmirësimin e cilësisë) dhe zgjidhja e mosmarrëveshjeve (duke detyruar ofruesit të informojnë për mekanizmat jashtëgjyqësorë).

Bashkëpunimi ndërinstitucional me BE-në

Neni 13 parashikon krijimin e një koordinatori kombëtar për ndërveprimin me Sistemin e Informacionit të Tregut të Brendshëm (IMI) dhe pikat e ndërlidhjes për çdo autoritet kompetent, duke siguruar ndihmë të ndërsjellë dhe shkëmbim informacioni në kohë reale.

Afatet dhe qasja e zbatimit

Projektligji parashikon që pjesa më e madhe e dispozitave, veçanërisht ato të lidhura drejtpërdrejt me shërbimet ndërkufitare, do të fillojnë efektet vetëm me anëtarësimin e plotë të Shqipërisë në Bashkimin Evropian. Kjo qasje bazohet në përvojat e vendeve të tjera me një rrugëtim të ngjashëm, siç është Kroacia, e cila adaptoi ligjin e saj për shërbimet dy vjet para anëtarësimit, duke përfshirë shënime shoqëruese për nisjen e efekteve të caktuara pas anëtarësimit.

Institucionet përgjegjëse për zbatim

Ministria e Ekonomisë, Kulturës dhe Inovacionit (MEKI) do të jetë institucioni kryesor përgjegjës për zbatimin, koordinimin dhe monitorimin e ligjit. Përveç MEKI-t, në këtë proces do të përfshihen një gamë e gjerë institucionesh dhe organesh, përfshirë ministri të linjës, urdhra profesionalë, agjencitë shtetërore dhe federata sportive.

Roli i Qendrës Kombëtare të Biznesit (QKB) do të forcohet si pikë e vetme kontakti për regjistrimin e biznesit dhe licencimin. Ndërsa Agjencia Kombëtare e Shoqërisë së Informacionit (AKSHI), si administrator i sistemit e-Albania, pritet të luajë një rol edhe më të rëndësishëm në ndërlidhjen dhe komunikimin në kohë reale me sistemin IMI të BE-së, pas bërjes efektive të pjesëmarrjes së Shqipërisë.

Projektligji, i hartuar në bashkëpunim me GIZ dhe ekspertë të kontraktuar, pritet të mos ketë efekte financiare të menjëhershme në buxhetin e shtetit, pasi kostot do të evidentohen me përcaktimin e programit të punës për rishikimin e akteve të tjera nënligjore dhe do të ndikojnë në buxhet pas anëtarësimit në BE.

Ky hap shënon një angazhim të fortë të Shqipërisë drejt përafrimit me standardet evropiane dhe lehtësimit të tregtisë së shërbimeve, duke hapur dyer të reja për zhvillim ekonomik dhe integrim të plotë në tregun e brendshëm të BE-së.