Shqipëria forcon sektorin e turizmit me një sistem të ri të dhënash

Qeveria shqiptare po ndërmerr një hap të rëndësishëm drejt modernizimit dhe zhvillimit të qëndrueshëm të turizmit. Një projektvendim i ri synon të përcaktojë dhe të strukturojë të dhënat parësore dhe dytësore që do të përbëjnë Sistemin e të Dhënave në Turizëm (SDT). Ky sistem, i cili pritet të miratohet brenda vitit 2025, do të shërbejë si një platformë thelbësore për mbledhjen, administrimin dhe analizimin e informacionit në këtë sektor jetik.

Qëllimi dhe përfitimet e SDT

Qëllimi kryesor i këtij projektvendimi është krijimi i një baze të dhënash shtetërore të strukturuar dhe funksionale për turizmin. Ky sistem do të ofrojë një pasqyrë të përditësuar të realitetit të sektorit dhe do të mbështesë:

Politikëbërjen– Duke ofruar të dhëna të sakta dhe të besueshme për zhvillimin e politikave kombëtare të turizmit.

Planifikimin– Ndihmon në planifikimin territorial të zonave turistike dhe shmangien e mbingarkesave në destinacionet e ndjeshme.

Kontrollin e zbatimit– Lehtëson monitorimin e zbatimit të politikave zhvillimore.

Koordinimin ndërinstitucional– Forcon bashkëpunimin mes institucioneve publike, duke reduktuar barrën administrative për operatorët turistikë, të cilët nuk do të duhet të dorëzojnë të njëjtat të dhëna në institucione të ndryshme.

Struktura e sistemit të ri

SDT do të përbëhet nga të dhëna parësore dhe dytësore. Të dhënat parësore do të mblidhen drejtpërdrejt nga institucioni administrues (Ministria e Turizmit dhe Mjedisit), ndërsa të dhënat dytësore do të vijnë nga sisteme të tjera shtetërore.

Sistemi do të strukturohet në tre module kryesore:

Regjistri qendror i turizmit– Për regjistrimin e subjekteve që ushtrojnë veprimtari në fushën e turizmit, si struktura akomoduese, agjenci turistike, udhërrëfyes, operatorë detarë dhe njësi të agroturizmit.

Moduli e-visitor– Për regjistrimin elektronik të vizitorëve në strukturat akomoduese.

Sistemi i të dhënave të turizmit– Për përpunimin dhe analizimin e informacionit për qëllime statistikore dhe raportimi.

Burimet dhe përdoruesit e të dhënave

Sistemi do të furnizohet me të dhëna nga një gamë e gjerë institucionesh dhe subjektesh, duke përfshirë:

Agjencitë turistike dhe strukturat akomoduese.

Agjencia Kombëtare e Zonave të Mbrojtura (AKZM).

Instituti i Statistikave (INSTAT).

Banka e Shqipërisë.

Policia e Shtetit dhe strukturat kufitare.

Ministria e Ekonomisë, Kulturës dhe Inovacionit.

Përdoruesit e mundshëm të këtyre të dhënave do të jenë njësitë e vetëqeverisjes vendore, Agjencia Kombëtare e Bregdetit, Drejtoria e Përgjithshme e Tatimeve dhe subjektet private në sektorin e turizmit. Ndërveprimi me bazat e tjera shtetërore do të bëhet nëpërmjet platformës qeveritare të ndërveprimit, duke siguruar një qarkullim efikas dhe të kontrolluar të informacionit.

Mbrojtja e të dhënave personale

Projektvendimi thekson se çdo përpunim i të dhënave personale do të bëhet në përputhje të plotë me legjislacionin për mbrojtjen e të dhënave personale, duke garantuar privatësinë e individëve. Subjektet e interesuara do të kenë akses vetëm në të dhëna statistikore, pa informacion me karakter personal.

Ministria e Turizmit dhe Mjedisit, në bashkëpunim me Agjencinë Kombëtare të Shoqërisë së Informacionit (AKSHI), do të jetë përgjegjëse për zbatimin e këtij vendimi. Aktualisht, një grup i përbashkët pune po përcakton termat e referencës për procedurën e prokurimit për ngritjen e SDT-së dhe vlerësimin e kostove financiare. Pas finalizimit të këtyre procedurave, do të ndiqen hapat për planifikimin buxhetor afatmesëm.

Ky projektvendim, ndonëse nuk synon përafrimin me acquis communautaire, është në përputhje me parimet evropiane për transparencën dhe digjitalizimin, duke shënuar një hap të rëndësishëm drejt një sektori turistik më të organizuar dhe efikas në Shqipëri.