SHBA rivendos vizat studentore, por kërkon akses në profilet e mediave sociale të aplikantëve

Departamenti Amerikan i Shtetit ka njoftuar sot se po rifillon procesin e pezulluar për aplikimet e vizave studentore, por me një ndryshim thelbësor: të gjithë aplikantët e huaj tani do t’u kërkohet të zhbllokojnë llogaritë e tyre në mediat sociale për shqyrtim nga qeveria amerikane.

Në një njoftim të publikuar të mërkurën, departamenti theksoi se zyrtarët konsullorë do të monitorojnë postimet dhe mesazhet për çdo përmbajtje që mund të konsiderohet armiqësore ndaj SHBA-së, qeverisë, kulturës, institucioneve apo parimeve të saj themeluese.

Pezullimi i përpunimit të vizave studentore, i vendosur në maj, është anuluar. Megjithatë, aplikantët e rinj që refuzojnë t’i bëjnë profilet e tyre në mediat sociale “publike” dhe të lejojnë shqyrtimin e tyre, mund të refuzohen.

Departamenti sqaroi se një refuzim i tillë mund të interpretohet si shenjë se aplikanti po përpiqet të shmangë kërkesën ose të fshehë aktivitetin e tij online.

“Sipas udhëzimeve të reja, zyrtarët konsullorë do të kryejnë një verifikim gjithëpërfshirës dhe të plotë të të gjithë aplikantëve për studentë dhe vizitorë shkëmbimi,” thuhet në deklaratën e departamentit. “Për të lehtësuar këtë verifikim,” aplikantëve “do t’u kërkohet të rregullojnë cilësimet e privatësisë në të gjitha profilet e tyre në mediat sociale në ‘publike’.” Ky verifikim i përmirësuar synon të sigurojë që çdo person që kërkon të vizitojë SHBA-në të shqyrtohet siç duhet.

Udhëzimet e brendshme dërguar zyrtarëve konsullorë specifikojnë se ata duhet të kërkojnë “çdo tregues armiqësie ndaj qytetarëve, kulturës, qeverisë, institucioneve ose parimeve themelore të Shteteve të Bashkuara.”