Kryeministri Edi Rama i është bashkuar sot liderëve botërorë në kryeqytetin francez për samitin e rëndësishëm të “Koalicionit të Vullnetmirëve” (The Coalition of the Willing).

Kreu i qeverisë shqiptare mbërriti në Pallatin Élysée, ku u prit me nderime nga Presidenti i Francës, Emmanuel Macron.

Rama ndau në rrjetet sociale një imazh nga ceremonia zyrtare, të cilën e shoqëroi me diçiturën: “Foto familjare e liderëve pjesëmarrës në takimin ‘The Coalition of the Willing’”.

Samiti, i cili mblodhi më shumë se 27 udhëheqës shtetesh dhe qeverish, kishte si objektiv madhor: finalizimin e një marrëveshjeje konkrete për garancitë e sigurisë së Ukrainës.

Në rast të një agresioni të mundshëm rus, vendet nënshkruese zotohen për:

Përdorimin e kapaciteteve ushtarake dhe mbështetje logjistike;

Ndarjen e inteligjencës së nivelit të lartë;

Iniciativa diplomatike të koordinuara;

Miratimin e paketave të reja të sanksioneve.

Agjenda e Kryeministrit Rama në Paris përfshiu edhe takime bilaterale të rëndësishme. Më herët, ai zhvilloi një bisedë me Ministrin e Drejtësisë së Francës, Gérald Darmanin. Në fokus të diskutimit ishte reforma në drejtësi në Shqipëri, specifikisht përfshirja e ekspertizës franceze në hartimin dhe konsolidimin e draftit të ri të Kodit Penal, me qëllim përafrimin e tij me standardet më të mira evropiane.

Emisarët e SHBA-së

Vëmendje të veçantë në samit ka marrë edhe prania e përfaqësuesve të lartë nga Shtetet e Bashkuara. Steve Witkoff, i dërguari special i Presidentit Donald Trump, së bashku me dhëndrin e presidentit, Jared Kushner, janë parë të mbërrijnë në Pallatin Élysée, duke sinjalizuar një angazhim të administratës amerikane në diskutimet për arkitekturën e re të sigurisë në Evropë.