Probleme me infrastrukturën rrugore / Reshjet e shiut e përkeqësojnë situatën në një prej rrugëve në zonën e ish- Fermentimit
Një prej zonave informale në periferi të qytetit të Shkodrës, konkretisht në lagjen Fermentim, vazhdon të mbetet e lënë në harresë prej vitesh.
Banorët e kësaj zone përballen çdo ditë me vështirësi të mëdha për shkak të mungesës së investimeve në infrastrukturë, ndërsa një nga rrugët kryesore të lagjes ndodhet në gjendje tejet të amortizuar.
Rruga është e dëmtuar, me gropa dhe baltë, duke u bërë e vështirë për t’u kaluar si nga këmbësorët ashtu edhe nga mjetet, veçanërisht gjatë periudhave me reshje shiu, kur situata përkeqësohet ndjeshëm.
Kjo rrugë, me një gjatësi prej rreth 800 metrash, përbën një problem serioz për lëvizjen e përditshme të banorëve, përfshirë fëmijët, të moshuarit dhe shërbimet e emergjencës, të cilat hasin vështirësi për të hyrë në zonë.
Mungesa e kanalizimeve dhe e sistemimit të duhur bën që uji të grumbullohet në rrugë, duke e kthyer atë në një burim rreziku dhe shqetësimi për komunitetin. Banorët kërkojnë prej kohësh ndërhyrje nga institucionet përkatëse, duke shpresuar se kjo zonë do të përfshihet në planet e investimeve për përmirësimin e infrastrukturës dhe rritjen e cilësisë së jetesës.
