PE pritet të prishë marrëveshjen BE-SHBA, taksat evropiane ndaj mallrave amerikane mund të hyjnë në fuqi më 7 shkurt

Parlamenti Evropian pritet të pezullojë miratimin e marrëveshjes tregtare mes BE-së dhe SHBA-së, e cila ishte arritur në korrik të vitit të kaluar. Burime pranë Komisionit për Tregti Ndërkombëtare bëjnë me dije se njoftimi do të bëhet të mërkurën pasdite në Strasburg, raporton BBC.

Marrëveshja ishte negociuar mes presidentit amerikan Donald Trump dhe presidentes së Komisionit Evropian, Ursula von der Leyen, gjatë një takimi në Skoci. Sipas saj, taksat amerikane ndaj importeve nga vendet e BE-së do të uleshin në 15 për qind, një ulje nga kërcënimi fillestar prej 30 për qind. Por për t’u vënë në fuqi, marrëveshja duhet të miratohet nga Parlamenti Evropian, i cili ende nuk ka përfunduar shqyrtimin.

Të shtunën, Manfred Ëeber, një anëtar gjerman me ndikim në Parlament, tha se miratimi nuk është i mundshëm në këtë fazë. Në të njëjtën kohë, BE-ja kishte pezulluar taksat hakmarrëse ndaj mallrave amerikane me vlerë 93 miliardë euro, pezullim që vlen deri më 9 shkurt. Nëse marrëveshja nuk miratohet ose pezullimi nuk zgjatet, taksat e BE-së do të hyjnë në fuqi më 7 shkurt. Lajmi rrit pasiguri në tregjet transatlantike dhe ndjekësit e politikës tregtare evropiane janë të vëmendshëm.

Ekspertët paralajmërojnë se vendimet e ardhshme të Parlamentit Evropian do të jenë kyçe për marrëdhëniet tregtare me SHBA-në. Në këtë kontekst, negociatat ndërmjet dy palëve mbeten të ndjeshme dhe çdo vonesë mund të sjellë pasoja ekonomike të menjëhershme.