Parandalohet një ngjarje kriminale – Arrestohet 29 vjeçari nga Shkodra, po dhunonte dhe kërcënonte të atin për ta vrarë
Uniformat blu kanë parandaluar një ngjarje kriminale në familje në qytetin e Shkodrës, ku një person po kërcënonte babain e tij për ta vrarë.
Drejtoria Vendore e Policisë Shkodër ka dhënë detaje për ngjarjen, nëpërmjet komunikatës për shtyp.
Kështu, Shërbimet e Komisariatit të Policisë Shkodër, pas njoftimit të marrë se një shtetas, banues në lagjen “10 Korriku”, Shkodër, po dhunonte babanë e tij dhe e kërcënonte atë, për ta vrarë, menjëherë kanë shkuar në adresën e dhënë.
Falë veprimeve të shpejta profesionale të shërbimeve të Policisë u bë kapja dhe arrestimi në flagrancë i shtetasit R. L., 29 vjeç.
Ky shtetas po dhunonte dhe kishte dëmtuar me mjet prerës, babanë e tij, shtetasin N. L., 61 vjeç, si dhe e kërcënonte atë, për ta vrarë.
Si pasojë e dëmtimeve, 61-vjeçari u dërgua në spital dhe pas marrjes së ndihmës së parë mjekësore është larguar në banesë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, njofton policia.
