Papa Leoni XIV bën thirrje të re për paqe: Nuk duhet të mësohemi me luftën

Papa Leoni XIV, në fund të audiencës së përgjithshme të sotme, ka lëshuar një thirrje të fuqishme për paqe, duke kujtuar konfliktet e shumta që po shqetësojnë botën dhe Selinë e Shenjtë. Ai theksoi se “zemra e Kishës është e shqyer nga britmat që vijnë nga vendet e luftës, veçanërisht nga Ukraina, Irani, Izraeli dhe Gaza.”

Papa i ri e ka vënë çështjen e paqes në krye të agjendës së tij që nga fillimi i pontifikatit, duke ndjekur hapat e Papa Françeskut. Ai paralajmëroi kundër mësimit me konfliktin: “Nuk duhet të mësohemi me luftën, përkundrazi duhet ta hedhim poshtë si tundim joshjen e armëve të fuqishme dhe të sofistikuara.”

Një shqetësim i madh për Papën është edhe evolucioni i armatimeve. “Meqenëse në luftën e sotme përdoren armë shkencore të çdo lloji, mizoria e tyre kërcënon ta çojë luftimin në një barbari shumë më të madhe se ajo e kohërave të kaluara,” theksoi ai. Selia e Shenjtë, duke e cilësuar “imorale” jo vetëm përdorimin, por edhe thjesht posedimin e armëve atomike, është thellësisht e shqetësuar nga kërcënimi i përdorimit të armëve gjithnjë e më shkatërruese.

Papa Leoni XIV përtëriti thirrjen e tij për të lënë armët, duke cituar dy nga paraardhësit e tij të mëdhenj.

“Në emër të dinjitetit njerëzor dhe të drejtës ndërkombëtare, u përsëris atyre që janë përgjegjës atë që thoshte Papa Françesku: ‘Lufta është gjithmonë një humbje’. Dhe me Piun XII: ‘Asgjë nuk humbet me paqen, gjithçka mund të humbasë me luftën’.”