Merret vendimi në Bruksel, në fund të majit çelet Grupkapitulli 3

Bashkimi Europian ka përmbyllur miratimin e çeljes së Grupkapitullit 3 të bisedimeve të anëtarësimit me Shqipërinë.

Ambasadori i Polonisë në Tiranë, Vojciech Unolt i tha Televizionit Publik në emisionin “Kuota” se vendimi i Brukselit nën presidencën polake, dy ditë më parë, do të finalizohet në fund të muajit.

“Jam i lumtur të njoftoj është marrë vendimi në Bruksel për të hapur edhe një Grupkapitull tjetër, 3-shi që merret me konkurrencën dhe rritjen gjithëpërfshirëse. Hapja e këtij grupkapitulli do të ndodhë pak më vonë, drejt fundit të majit. Pra, ky është një tjetër sukses i rëndësishëm që mund të arrijmë me Shqipërinë brenda presidencës sonë”, tha Unolt.

Ky është Grupkapitulli i katërt në totalin prej 6 grupkapitujsh të bisedimeve, gjë që e bën Shqipërinë të drejtojë aktualisht procesin e zgjerimit.

“Shqipëria është bërë, së fundmi, një nga liderët e procesit të zgjerimit, dhe kjo është arsyeja pse Presidenca Polake e Këshillit të BE-së ka arritur përparim të rëndësishëm, veçanërisht për Shqipërinë në këtë fushë”, tha ambasadori i polak në vendin tonë.

Me hapjen e Grupkapitullit 3, Shqipëria shënon rekordin europian të hapjes së 24 kapitujve të bisedimeve të anëtarësimit brenda pak muajsh nga 35 që janë gjithsej.

Kjo e bën realiste e të mbërritshme edhe hapjen e dy grupkapitujve të tjerë brenda këtij viti, një ambicie e Shqipërisë e mbështetur nga Bashkimi Europian.