Më 10 shkurt protesta kombëtare, Berisha: Do vazhdojmë me vendosmëri absolute deri në triumfin e Shqipërisë

Kryedemokrati Sali Berisha ka deklaruar për mediat se më 10 shkurt opozita do të mbajë protestën e radhës kombëtare. Ai thekson se gjithnjë e më shumë po rritet numri i qytetarëve që kërkojnë të protestojnë për atë që ai e cilëson si “largimin e këtij armiku të egër të qenies së shqiptarëve”.

Berisha deklaroi se opozita do të vijojë me vendosmëri absolute protestat e saj, deri në triumfin e Shqipërisë

“Gjithnjë e më i madh është numri i qytetarëve që kërkojnë një gjë të tillë. Unë i siguroj ata se kërkesën e tyre e konsideroj shumë të drejtë dhe se ajo në rastin më të parë të mundshëm do të zbatohet.

Pra, ata janë qytetarë të përgjegjshëm, që duan të përballen me këtë shtet të degraduar, të degjeneruar në shkallë ekstreme. Po si mundet një gjykatës Kushtetues të mos ndjenjë përgjegjësinë ligjore. Të mos ndjejë përgjegjësi para qytetarëve, por të bëhet strofulla e fundit e hajdutit të tij.

Vetëm fjala e qytetarëve ka ngelë këtu dhe unë kam bindje se këtë betejë qytetarët do ta fitojnë.

Nuk janë të paktë ata që po shkelmojnë mbi dinjitetin e tyre, ata që si shushunja po u thithin gjakun çdo ditë. Por prap guximi qytetar, ndershmëria dhe morali qytetar është qindra herë më i fuqishëm se ata.

Kështu që e kam deklaruar dhe e deklaroj, tani kemi një objektiv, largimin e këtij armiku të egër të qenies së shqiptarëve”, deklaroi Berisha.