Marrëveshja Shqipëri-Itali për pensionet – U miratua nga Dhoma e Ulët e Parlamentit italian, i kalon Senatit
Dhoma e Ulët e Parlamentit Italian miratoi me 273 vota pro dhe asnjë kundër ratifikimin dhe zbatimin e marrëveshjes ndërmjet Republikës së Italisë dhe Republikës së Shqipërisë për sigurimet shoqërore. Kjo marrëveshje u nënshkrua në Romë më 6 shkurt 2024 mes ministrave të Jashtëm të dy vendeve Igli Hasani dhe Antonio Tajani.
Dokumenti rregullon përfitimet e pensioneve, papunësisë, sëmundjeve dhe amësisë së atyre që ushtrojnë ose kanë ushtruar një aktivitet si të punësuar ose të vetëpunësuar në të dy shtetet.
Pr.ligji tani i kalon Senatit dhe nëse Dhoma e Lartë e Parlamentit italian e miraton, marrëveshja për sigurimet shoqërore quhet e ratifikuar plotësisht.
Janë rreth 500 mijë shqiptarë që përfitojnë nga marrëveshja me Italinë, si dhe 4 mijë shtetas italianë që përfitojnë pension në Shqipëri. Për të marrë pension në Itali duhen 20 vite pune, ndërsa për të përfituar pension në Shqipëri mjaftojnë 15 vite pune.
