Liqeni i Fierzës vijon të ndotet me mbeturina, pavarësisht ndërhyrjeve
Liqeni i Fierzës vazhdon të jetë një basen grumbullues për mbetjet urbane të verilindjes së vendit.
Kjo situatë përsëritet prej vitesh, më zakonisht gjatë periudhës pranverë–vjeshtë, por edhe në dimër, me mbeturina të shumta në sipërfaqen e liqenit dhe në vijën liqendore.
Një vit më parë në grykëderdhjen e lumit Sheja u vendos një pritë për minimizimin dhe frenimin e ndotjes në liqenin e Fierzës, por pa mundur të zgjidhë problemin madhor të kësaj ndotjeje, burimet e së cilës vijnë pikërisht nga dy lumenjtë kryesorë: Drini i Zi dhe Drini i Bardhë.
Pavarësisht projekteve, ndotja e liqenit është kthyer në një problematikë shqetësuese çdo herë që ka rënie apo ngritje të nivelit të ujit.
Visar Mataj, aktivist në Qendrën për Progres Rinor, thotë se aksionet e pastrimit që ndërmarrin nuk janë të mjaftueshme për zgjidhjen e këtij problemi.
“Duhet një plan më i mirëfilltë në lidhje me vazhdimësinë e këtyre aksioneve, sepse ato duhen shtrirë më gjerë, duke marrë parasysh edhe institucionet vendore apo komunitetin në përgjithësi. Të krijohet një kulturë që realisht të vihet në zbatim dhe të merret në konsideratë rëndësia dhe vlera që ka pastrimi,” thotë z. Mataj.
Gjatë vitit 2024, për herë të parë u vendosën dy prita për frenimin e ndotjes, në lumin e Shejës në Bushat dhe në Përroin e Kolshit, projekte të implementuara nga Këshilli i Qarkut Kukës me financimin e Bashkimit Europian në kuadër të projekteve mjedisore “Biodrini”.
