“Libra të një kohe tjetër” – Ekspozitë historike me tekstet shkollore të periudhës së diktaturës
“Libra të një kohe tjetër” është ekspozita me karakter historik, organizuar nga Biblioteka “Marin Barleti” në bashkëpunim me Vendin e Dëshmisë dhe Kujtesës.
Ajo është konceptuar si një vështrim i përgjithshëm në tekstet kyçe shkollore gjatë periudhës së diktaturës komuniste në vendin tonë.
E ndarë në 6 ekspozitorë, secili prej tyre përmban grupime ndërlëndore librash shkollorë ndërmjet viteve 1949-1985.
Këto mjete didaktike, të ideologjizuara me frymën partiake dhe atë të komunizmit, u shërbenin interesave politike për kontrollin e pushtetit përmes indoktrinimit të brezave të rinj. Lufta ndaj fesë ishte njëra prej tyre.
Ekspozita “Libra të një kohe tjetër” i drejtohet kryesisht nxënësve të sotëm për të kuptuar më mirë këtë aspekt historik të diktaturës në Shqipëri.
Ajo do të qëndrojë e hapur në Muzeun e Kujtesës deri në ditët e para të vitit të ri.
