Katër ministra grekë japin dorëheqjen pas skandalit për shpërdorimin e fondeve të BE-së për bujqësinë
Makis Voridis, Nea Dimokratia during parliamentary dispute at level of Party leaders on the topic of corruption in Athens on October 10, 2016. (Photo by Wassilios Aswestopoulos/NurPhoto via Getty Images)
Katër ministra të qeverisë konservatore greke të kryesuar nga partia Demokracia e Re dhanë dorëheqjen të premten si pasojë e një skandali në lidhje me fondet e BE-së për bujqësinë.
Ministrat ishin të gjithë të lidhur me Ministrinë e Bujqësisë gjatë periudhës 2019–2022, ndonëse deri tani kanë mbajtur poste të ndryshme, si ministri aktual i Migracionit, Makis Voridis; zv.ministri i Jashtëm, Tassos Hadjivassiliou; zv.ministri për Zhvillimin Rural dhe Ushqimin, Dionysis Stamenitis; dhe zv.ministri për Qeverisjen Digjitale, Christos Boukoros.
OPEKEPE është agjencia greke përgjegjëse për shpërndarjen e subvencioneve për bujqësinë, por kryeprokurorja e BE-së, Laura Kovesi, zbuloi se disa nga deklaratat e administruara ishin të falsifikuara dhe miliona euro kishin shkuar në ferma që nuk ekzistonin.
Disa fermerë që mbarështojnë bagëti në ishullin e Kretës janë akuzuar si pjesë e skemës së mashtrimit për periudhën 2019 dhe 2022. Sipas medieve greke, buxheti total për fermat organike gjatë asaj periudhe ishte 298 milionë euro, ndërsa aplikimet për subvencione në OPEKEPE arritën në 705 milionë euro.
Nga telefonatat e përgjuara u zbulua se për rastin në fjalë individët më sipër ishin koordinuar me ministra të qeverisë greke për të ndërhyrë që të “hiqnin qafe” prokuroren Popi Papandreou, e cila po hetonte çështjen.
Qeveria greke e ka shkrirë agjencinë përgjegjëse, duke ia lënë këtë veprimtari Autoritetit të Pavarur për të Ardhurat Publike. /Euractiv, Kathimerini
