Kanosi fqinjin e tij me pistoletë, në fshatin Dobraç /  Kapet në flagrancë dhe prangoset një  41-vjeçar  

Efektivat e policisë së Shkodrës kanë bërë të mundur parandalimin e një ngjarjeje të rëndë.

Burimet policore bëjnë të ditur se gjatë orëve të para të pasdites së sotme , një shtetas nga lagjja Dobraç e Shkodrës ka kanosur fqinjin e tij,  duke qëlluar me armë zjarri pistoletë.

Specialistët për Hetimin e Krimeve të Komisariatit të Policisë Shkodër, në bashkëpunim me shërbimet e Patrullës së Përgjithshme, të mbeshtetura nga Forca e Posaçme “Shqiponja”, menjëherë pas marrjes së njoftimit se në Dobraç, një shtetas kishte kanosur me armë zjarri, fqinjin e tij, kanë organizuar punën për kapjen e autorit dhe zbardhjen e rrethanave të rastit.

Si rezultat i veprimeve të shpejta, u kap në flagrancë dhe u arrestua shtetasi S. J., 41 vjeç, banues në Dobraç.

Nga veprimet e para proceduriale dyshohet se për motive të dobëta, shtetasi S. J. ka qëlluar me armë zjarri pistoletë, në tokë, për të kanosur fqinjin e tij, shtetasin A. K.

Materialet procedurale do t’i kaloj ë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.