Integrimi i Kosovës, Osmani takohet me Orav
Presidentja e Kosovës, Vjosa Osmani, priti sot (14 maj) në një takim Shefin e Zyrës së Bashkimit Evropian në Kosovë, Aivo Orav, për të diskutuar zhvillimet më të fundit politike në vend dhe për të theksuar rëndësinë e angazhimit të vazhdueshëm të BE-së për procesin e integrimit evropian të Kosovës.
Sipas njoftimit të Presidencës, gjatë bisedës, Osmani e informoi ambasadorin Orav për një takim konsultativ të paralajmëruar, që do të mbahet nesër me liderët e partive politike, një hap i rëndësishëm për forcimin e dialogut dhe bashkëpunimit politik në vend.
Në fokus të diskutimeve ishte gjithashtu mbështetja e vazhdueshme e BE-së për Kosovën. U përmendën vizitat e larta të drejtuesve të Bashkimit Evropian, përfshirë vizitën e kryesuesit të Këshillit të BE-së, António Costa, që do të zhvillohet po sot. Kjo vizitë, sipas Osmanit, është një sinjal i qartë i mbështetjes së Bashkimit Evropian për integrimin e Kosovës në strukturat evropiane.
Ky takim është një tjetër dëshmi e angazhimit të Bashkimit Evropian në procesin e integrimit të Kosovës, duke mbështetur zhvillimin e institucioneve demokratike dhe forcimin e stabilitetit politik në vend.
