In Memoriam / Dashamir Dini, figura që do kujtohet gjatë
Kjo ishte dalja e fundit në media e Dashamir Dinit, në datën 13 maj, në kuadër 80- vjetorit të Radio Shkodrës.
Mëngjesin e datës 28 qershor, një lajm i trishtë ka ardhur nga Italia!
Është ndarë nga jeta Dashamir Dini, ish- drejtor, ish- kryeredaktor dhe ish- gazetar i Radio Shkodra dhe RTSH Shkodra përgjatë 22 viteve.
Ai ndërroi jetë nga hemoragjia celebrale akute në Bergamo të Italisë, ku po mjekohej nga një sëmundje e rëndë që iu diagnostikua kohët e fundit.
Për 7 vite, Dashamir Dini ishte drejtor i Radio Shkodra dhe RTSH Shkodra në harkun kohor 2000- 2003 dhe më pas në vitet 2017- 2021.
Në te gjitha detyrat që ishte nga stafi i ketij institucioni, Dashamir Dini do te mbahet mend jo vetëm për profesionalizmin dhe korrektësinë në detyrë, por edhe për tiparet e nje njeriu fisnik e miqësor me të gjithë.
Më herët, Dini ka mbajtur poste drejtuese në Partinë Socialiste, dega Shkodër, duke qënë një prej figurave kyçe të së majtës në këtë qark.
Një pasion i veçantë i tij, ishte letërsia, veçanërisht poezia, të cilën ai e bashkëndante shpesh herë edhe në rrjetet sociale.
Dhimbjen e madhe për humbjen e të birit, Ergit, ai e ktheu ne vargje te panumërta duke lënë pas një krijimtari të çmuar poetike.
Dashamiri Dini la pas dy vajzat Arlindën dhe Barbanën si dhe bashkëshorten Mimozën.
Stafi i RTSH Shkodra, i shpreh ngushëllime familjes, të afërmëve, miqve dhe të njohurve për këtë humbje të madhe dhe shumë para kohe.
