Heshtje zgjedhore, nesër qytetarët votojnë për parlamentin e ri

Pas një muaji fushate intensive brenda dhe jashtë vendit, kjo e shtunë, 10 maj, shënon heshtjen zgjedhore në vend. Qytetarët do t’i drejtohen kutive të votimit nesër, më 11 maj, për të zgjedhur 140 deputetët e parlamentit të ri.

Risi e këtyre zgjedhjeve është pjesëmarrja për herë të parë e diasporës shqiptare në votim. Gjatë fushatës, subjektet politike kanë zhvilluar takime edhe me shqiptarët jashtë vendit.

Më 11 maj qendrat e votimit do të hapen në orën 07.00 dhe do të mbyllen në 19.00, ku të drejtë vote kanë 3,713,761 shtetas shqiptarë, prej të cilëve 114,642 do të votojnë për herë të parë.

Mbrëmjen e 9 majit PS dhe PD mbyllën fushatën zgjedhore në Tiranë ku dhanë edhe mesazhet e tyre të fundit politike drejtuar qytetarëve. Socialistët e fokusuan fushatën tek integrimi në BE deri në vitin 2030, ndërsa demokratët theksuan nevojën për ndryshim dhe rritjen e mbështetjes sociale.

Për të garantuar mbarëvajtjen e procesit zgjedhor, SPAK, KQZ dhe Prokuroria e Përgjithshme kanë ngritur një Task-Forcë të përbashkët. Ndërkohë, Policia e Shtetit ka hartuar një plan të detajuar masash dhe ka trajnuar 6,838 efektivë me uniformë dhe 813 specialistë për hetimin e krimeve zgjedhore dhe ruajtjen e objekteve zgjedhore.