Efektet e ngrohjes globale/ Islanda regjistron Krishtlindjet më të nxehta ndonjëherë
Temperatura rekord prej gati 20 gradë celsius u regjistruan në Islandë në natën e Krishtlindjeve, ka konfirmuar zyra lokale meteorologjike. Seyðisfjörður, një qytet i vogël në lindje të Islandës, arriti 19.8 gradë celsius më 24 dhjetor. Temperaturat mesatare të dhjetorit në Islandë janë midis -1 dhe 4 gradë celsius.
Rekordi i mëparshëm u vendos më 2 dhjetor 2019, kur temperatura u mat në 19.7 gradë celsius në Kvískerjar në Öræfi, në juglindje të Islandës. Birgir Örn Höskuldsson, një meteorolog në Zyrën Meteorologjike Islandeze, i tha agjencisë së lajmeve RÚV se ishin krijuar kushtet për rekordin e temperaturës për shkak se ajri i ngrohtë me origjinë tropikale ishte zhvendosur mbi vend.
Një sistem i fortë me presion të lartë po tërhiqte ajër të ngrohtë dhe të lagësht në jug dhe po pengonte ajrin e ftohtë të hynte brenda. Islanda po ngrohet për shkak të ngrohjes globale të shkaktuar nga djegia e lëndëve djegëse fosile dhe çlirimi i gazrave serrë në atmosferë. Në maj, pati valë të nxehta rekord në të gjithë vendin me zona 3-4 gradë Celsius më të nxehta se zakonisht.
Rekordet e temperaturës së majit u vendosën në 94% të të gjitha stacioneve automatike që kanë funksionuar për të paktën 20 vjet. Temperatura më e lartë ishte 26.6 gradë Celsius në aeroportin Egilsstaðir në Islandën Lindore më 15 maj. Në fillim të këtij viti, u gjetën edhe mushkonjat në Islandë për herë të parë, pasi ngrohja globale e bën atë më mikpritëse për insektet. Vendi deri atëherë ishte një nga vetëm dy vendet që nuk kishin një popullsi mushkonjash, tjetri ishte Antarktida.
