Astronautët e NASA-s kthehen në Tokë pas trajtimit mjekësor në Stacionin Hapësinor
Katër anëtarë të ekuipazhit janë larguar nga Stacionin Ndërkombëtar Hapësinor (ISS) dhe po kthehen në Tokë, pasi një problem mjekësor bëri që misioni i tyre të shkurtohej për një muaj, në evakuimin e parë mjekësor të NASA-s .
Një video nga NASA tregoi astronautët amerikanë Mike Fincke dhe Zena Cardman, kozmonautin rus Oleg Platonov dhe astronautin japonez Kimiya Yui duke u shkëputur nga ISS mbrëmjen e djeshme, pas pesë muajsh në hapësirë.
“Koha e nisjes sonë është e papritur, por ajo që nuk më habiti ishte se sa mirë u bashkua ky ekip si familje për të ndihmuar njëri-tjetrin dhe thjesht për t’u kujdesur për njëri-tjetrin“, tha Cardman para udhëtimit të kthimit.
Agjencia hapësinore amerikane ka refuzuar të zbulojë se cili anëtar i ekuipazhit ka problemin shëndetësor ose të japë detaje rreth problemit, por ka theksuar se kthimi nuk është një emergjencë.
Anëtari i ekuipazhit të prekur “ishte dhe vazhdon të jetë në gjendje të qëndrueshme“, tha të mërkurën zyrtari i NASA-s, Rob Navias.
Kapsula SpaceX Dragon që mban katër anëtarët e ekuipazhit është planifikuar të zbresë në brigjet e Kalifornisë mëngjesin e kësaj të enjte.
“Para së gjithash, të gjithë jemi mirë. Të gjithë në bord janë në gjendje të qëndrueshme, të sigurt dhe për ta kujdeset mirë. Ky ishte një vendim i qëllimshëm për të lejuar që vlerësimet e duhura mjekësore të ndodhin në terren, ku ekziston i gjithë spektri i aftësive diagnostikuese. Është vendimi i duhur, edhe nëse është paksa i hidhur”, tha Fincke, piloti i SpaceX Crew-11, në një postim të kohëve të fundit në mediat sociale.
