43 projekte për Shqipërinë, Italinë dhe Malin e Zi, Interreg IPA dhe BE investojnë 41 milionë euro
Për një Adriatik më të gjelbër, më inovativ dhe më mbështetës, tri shtete – Italia, Shqipëria dhe Mali i Zi – do të zbatojnë 43 projekte të financuara nga programi Interreg IPA dhe Bashkimi Europian.
Me një investim total prej 41 milionë eurosh, projektet u përzgjodhën nga 198 propozime që përfshinin 220 partnerë.
Përfituesit e përzgjedhur në të tria vendet përfshijnë universitete, qendra kërkimore, institucione trajnimi, dhoma tregtie si dhe institucione lokale dhe qendrore. Drejtuesja e Saspak, Eridana Cano, theksoi në fjalën e saj se këto projekte kontribuojnë në forcimin e mëtejshëm rajonal në përputhje me standardet e BE-së.
“Jemi këtu për të rikonfirmuar një vizion të përbashkët për rajonin e Adriatikut, një hapësirë bashkëpunimi, ku sfidat trajtohen në mënyrë të përbashkët, ku projektet ndërtohen mbi besimin dhe partneritet me një vizion afatgjatë, ku asnjë qytetar nuk mbetet pas,” u shpreh znj. Cano.
Zyrtari i Komisionit Europian, Gilles Kittel, u shpreh se projekte të tilla ndihmojnë në rrugën drejt integrimit.
“Këto iniciativa janë instrumente për forcimin e kapaciteteve administrative të Shqipërisë dhe Malit të Zi, si pjesë e procesit të para-aksesionit në Bashkimin Europian, përmes bashkëpunimit konkret me një shtet anëtar. Kjo u mundëson partnerëve të ndërtojnë aftësi të reja menaxheriale. Gjithashtu, përveç ndërtimit të kapaciteteve teknike, projektet ofrojnë një hapësirë praktike për të aplikuar dhe përmirësuar strategjitë e komunikimit, duke sjellë përfitime reale për qytetarët dhe bizneset,” tha z. Kittel.
Fushat strategjike që përfshijnë projektet fituese janë:
- 10 projekte për konkurrueshmërinë dhe inovacionin;
- 16 projekte për qëndrueshmërinë mjedisore;
- 6 projekte për mobilitetin dhe lidhshmërinë;
- 11 projekte për përfshirjen sociale.
